ہر شخص اس امر سے بخوبی واقف ہے کہ جہالت و گمراہی کے گھٹا ٹوپ اندھیروں کو دور کر کے علوم اسلامیہ کی شمع روشن کرنا نیز بے دینی اور الحاد کے زہر یلے اثرات کا خاتمہ کر کے موجودہ اور آئندہ نسل کی اخلاقی و دینی تربیت کا بندوبست کرنا علماء اسلامیہ کا اہم فریضہ ہے ۔ اس فریضہ کی بجا آوری کی خاطر تقریباً ترپن (53)سال  قبل محض اللہ تعالیٰ کی ذات پر بھروسہ کرتے ہوئے ایک چٹیل اور بے آب و گیاہ میدان میں جامعہ عثمانیہ شور کوٹ شہر کی بنیاد رکھی گئی ۔ جامعہ کے مہتم و بانی مولانا بشیر احمد صاحب خاکی رحمۃ اللّٰہ علیہ نے اس کی ترقی کی خاطر اپنے شب و روز وقف کر دیتے اور اپنی انتھک محنت کے نتیجے میں الحمد للہ اب جامعہ ملک کی اہم درسگاہوں میں سے ایک اہم درسگاہ شمار ہونے لگا ہے ۔ جہاں نہ صرف یہ کہ علاقہ یا پاکستان کے طلبہ اپنی علمی پیاس بجھانے کے لئے رخت سفر باندھ کر یہاں پہنچتے ہیں بلکہ جامعہ کی علمی شہرت سے متاثر ہو کر بیرون ملک کے بھی کافی طلبا۔ ہر سال جامعہ میں داخل ہوتے ہیں۔جامعہ ہذا مسلکاً اہلسنت و الجماعت مشرباً حنفی ہے اور شاہ ولی اللہ محدث دھلوی رحمتہ اللہ علیہ اور شیخ الہند مولانا محمود الحسن صاحب قدس سرہ کی تشریحات پر عمل پیرا ہے ۔